إكلير الشيكولاتة بالكاست.......

إكلير الشيكولاتة بالكاستر
الإكلير ده بنات كثير بتحبه وبتسأل على طريقته، دلوقتي هتقدري تعمليه بكل سهولة، ومش هيأخذ منك أكثر من 45 دقيقة...

المقادير:
ربع كوب لبن
ربع كوب ماء
50 جرام زبدة
نصف كوب دقيق
بيضتين
100 جرام شيكولاتة سايحة

مقادير الكاستر:
كيس كاستر من السوبر ماركت
كوب لبن
نصف كوب سكر بودرة

الطريقة:
1- سخني الفرن على درجة حرارة متوسطة.

2- أحضري الصينية وافرشي في قاعدتها ورقة زبدة.

3- حطي اللبن والمية والزبدة في حلة تيفال على نار متوسطة الحرارة، وقلبيهم مع بعض لمدة 5 دقايق أو لغاية لما الخليط يبدأ يغلي.

4- شيلي الخليط من على النار، وبعد كده ضيفي عليه الدقيق، وقلّبيهم مع بعض بمعلقة خشب لغاية ما تلاقي الخليط تماسك ويتحوّل لعجين ويبقى كتلة واحدة، وبعدين طلعي العجينة من الحلة وسيبيها تبرد.

5- بعد ما يبرد العجين ضيفي عليه البيض، بس خذي بالك من إنك هتضيفي في كل مرة بيضة واحدة وتضربيهم مع بعض كويس بالمضرب الكهربائي لغاية لما الخليط يتجانس مع بعضه.

6- بعد كده أحضري كيس قماش أو بلاستيك وافتحي فيه فتحة صغيرة علشان تحطي فيها "البلبلة" اللي هتشكل الإكلير.

7- حطي العجين بتاعك جوه الكيس أو القمع المخصوص بالإكلير، واللي بيكون شبه القمع الخاص ببلح الشام بس على أعرض وأطول شوية.

8- رصّي الإكلير في الصينية اللي فرشتي فيها ورقة الزبدة، ودخليه في الفرن لمدة 20 دقيقة أو لغاية لما تلاقيه نفش ولونه بقى ذهبي.

9- بعد كده طلعيه من الفرن، وافتحي في كل قطعة فتحة صغيرة من الجنب، ورجعيه الفرن تاني لمدة 10 دقايق، وبعد كده طلعيه تاني علشان تحشيه بالكاستر.

10- علشان تعملي الكاستر، بتحطي الكاستر واللبن والسكر مع بعض في حلة على نار هادية، وقلّبيهم كويس لغاية لما يتحوّل عجين، وبعد كده شيليه من على النار وسيبيه 5 دقايق يبرد، وغطّيه بورق بلاستيك ودخّليه الثلاجة لمدة نص ساعة.

11- زيّني الإكلير من فوق بالشيكولاتة.. وبألف هنا وشفا.

لالا ياjojo كنتى افضلى امتحنى شويه هههههههههههه

اختك من عشاق الشيكولاته وكده بتوزينى على الفساد وانا اجدع واحده تتوز يعنى

وخصوصا مع الشيكولاته هههههههههههه

تسلم ايدك ياعسل