اصناف من الشيكولاته تحفه 1

والنهارده هنعمل مع بعض أكثر من وصفة بالشيكولاتة علشان تدلّعي بيهم نفسك وتفرّحي عيلتك...

ممكن تزيّنيها ببيض الشيكولاتة


تورتة الشيكولاتة بالبندق
دي وصفة سهلة، وهتأخذ منك في إعدادها ساعة ونصف، بس اوعي تاكلي صوابعك وراها...

المقادير:
200 جرام شيكولاتة خام مفرومة
200 جرام زبدة طريّة "مش مثلّجة"
كوب سكر بني "متوافر في السوبر ماركت"
معلقة فانيليا
بيضتين
كوبايتين إلا ربع دقيق
ربع كوب كاكاو
كوب إلا ربع لبن حليب
كوب شيكولاتة بالبندق، وفيه منها أنواع كتيرة موجودة في أي سوبر ماركت
للتزيين ممكن تستخدمي قطع الشيكولاتة اللي على شكل بيض، ودي بتكون موجودة في السوبر ماركت أو في محلات الحلويات، وممكن كمان تستخدمي الكريم شانتي أو الفراولة.

الطريقة:
1- حضّري صينية مناسبة للتورتة، وادهنيها بالزبدة، وسخّني الفرن على درجة حرارة متوسطة.

2- أحضري الشيكولاتة الخام، وسيّحيها في حمام ماء دافئ بإنك تحطي الشيكولاتة في طاسة فوق حلة فيها مية بتغلي، علشان تسيح بسخونة بخار المية، وبعد ما الشيكولاتة تسيح سيبيها تبرد شوية.

3- اضربي البيض مع السكر والفانيليا بالمضرب الكهربائي لغاية ما يبقى شكلهم كريمي.

4- ضيفي الشيكولاتة اللي سيّحتيها على الخليط، واضربيهم مع بعض كويس.

5- اضربي اللبن مع الكاكاو والدقيق، وبعد كده ضيفيهم على الخليط السابق، وامزجيهم مع بعض كويس لغاية ما يتجانسوا، وصبّي الخليط في الصينية ودخليها في الفرن السخن.

6- سيبي الصينية في الفرن لمدة ساعة، وبعد كده اختبري العجينة كل فترة بإنك تحطي فيها سكينة، ولو طلعت نظيفة من غير عجين عليها تبقى استوت، وبعد كده طلعيها من الفرن وسيبيها تبرد.

7- ابتدي غطي التورتة بشيكولاتة البندق "نوتيلا"، وزيّنيها ببيض الشيكولاتة أو الفراولة أو الكريم شانتي، وحطيها في طبق التقديم... وبألف هنا وشفا.

********************

الطبق ده جامد جداً وسهل أوي


بسكويت الكراميل والشيكولاتة
أما الطبق ده فجامد جداً وسهل أوي، وكمان جديد، وهيعجبك، ومش هيأخذ منك غير نصف ساعة...

المقادير:
باكو بسكويت سادة "يُفضّل ماري أو دايجستيف"
90 جرام زبدة سايحة
عبوة لبن مكثّف "متوافر في السوبر ماركت"
نصف كوب شربات
200 جرام شيكولاتة خام مبشورة
150 جرام كريمة لباني
قوالب كيك صغيرة "موجودة في أي محل أدوات منزلية"

الطريقة:
1- سخّني الفرن على درجة حرارة متوسّطة.

2- ادهني القوالب الصغيرة بالزبدة.

3- أحضري البسكويت وكسّريه لقطع صغيرة جداً لغاية ما يبقى زي البودرة، وبعد كده اعجنيه مع نصف مقدار الزبدة اللي عندك لغاية ما يبقى عجينة متماسكة.

4- حطّي العجين في القوالب وافرديه بأطراف صوابعك، وبعد كده حطي القوالب في الفرن لمدة 8 دقائق أو لغاية لما العجين يبقى لونه ذهبي.

5- في نفس الوقت أحضري اللبن المكثّف والشربات وباقي مقدار الزبدة، وحطيه في حلة على النار، وقلّبيهم لغاية لما الزبدة تسيح وبكده تكوني عملتي الكراميل.

6- صبّي الكراميل بالتساوي على البسكويت اللي في القوالب الصغيرة، ودخّليه الفرن تاني لمدة 10 دقايق؛ وبعد كده طلعيه وسيبيه لغاية لما يبرد.

7- أحضري الشيكولاتة والكريمة اللباني، وامزجيهم سوا على نار هادية لغاية لما الشيكولاتة تسيح وتمتزج بالكريمة.

8- صبّي الشيكولاتة على البسكويت والكراميل من فوق، وحطيه في الثلاجة لمدة نصف ساعة.

9- طلعيه بعد كده وحطيه في أطباق التقديم.. وبألف هنا وشفا.

تسلم ايدك ياعسل

ريجيم مين بقا ههههههههههه