اسباب هبوط البورصة المصرية فى الفترة الاخيرة؟

قبل مانتكلم عن اسباب الهبوط لازم نفهم حاجة مهمة........
طبعا كانا عارفين المؤشر بتاع البورصة اللى بيقيس حركة الاسعار و التداول يوميا ..لو رجعنا الى بداية العام الحالى كان فى اشهر اكتتاب حدث فى تاريخ البورصة المصرية و هو اكتتاب المصرية للاتصالات اللى كان تقريبا فى بداية العام .مع هذا الاكتتاب و دخول اعداد هائلة من الافراد فى هذا السهم و غيرة طبعا صعد المؤشر فى خلال شهر يناير فقط 25% تقريبا عن السنة الماضية كلها و طبعا دى نسبة كبيرة جدا و خطيرة و من هنا يظهر اول سبب فى هذا الهبوط

1-صعود المؤشر بنسبة 25% عن السنة الماضية: طب اية المشكلة لما المؤشر يصعد بنسبة كبيرة؟
ركز معايا....المشكلة ان الصعود دة استغرق شهر تقريبا فطبعا الافراد و المستثمرين اللى اشتروا فى بداية هذا الشهر قد حققوا الارباح اللى عايزينها فقاموا بالبيع دفعة واحدة لجنى الارباح فطبعا سيزيد العرض عن الطلب و ينزل سعر السهم عن السعر اللى وصل الية خلال فترة الصعود ..طبعا قيس الكلام دة على اعداد كبيرة من المستثمرين و لافراد و الشركات فطبعا تكون النتيجة هو الهبوط الكامل فى الاسعار

2-وجود عدة اكتتابات فى وقت واحد:...يعنى اية اكتتاب؟ (تقريبا انا مشرحتوش)
الاكتتاب هو ان تقوم شركة بطرح اسهم لاول مرة و يقوم الافراد بشراء هذة الاسهم بقيمة اسمية ..يعنى اية؟
يعنى مثلا الشركة المصرية للاتصالات عندما قامت بالطرح لاول مرة اكتتب الناس فى هذا الاكتتاب بسعر السهم و هو 14 جنية و لكن عند طرح السهم لاول مرة كان سعرة 22 جنية القيمة الاسمية هى ال 14 جنية لكن طالما ان الاكتتاب خلص ماينفعش انت كمستثمر عادى ان تقوم بشراء السهم بعد الاكتتاب بالقيمة الاسمية و لكن تشترية بقيمة السوق اللى هى 22 جنية..يا رب تكون المعلومة وصلت
و فى نوع تانى من الاكتتاب و يسمى اكتتاب لحاملى الاسهم وبيطبق علية نفس الكلام اللى قولناة قبل كدة ولكن الافراد اللى مسموح بشرائة هم حاملى الاسهم لفترة معينة فقط و ليس جميع الافراد
المهم نرجع لموضوعنا و هو وجود عدد كبير من الاكتتابات طبعا زى ماحنا شوفنا الاكتتاب دة بيبقى فرصة تششترى السهم بقيمتة الاسمية و تبيعة بسعر السوق و تحقق الارباح السريعة علشان كدة الناس كلها اول ما تعرف ان فى اكتتاب تلاقى كلة هوب راح بايع اللى معاة علشان يعمل سيولة مالية يقدر يكتتب بيها و دة طبعا بيؤدى الى ان العرض بيبقى اكتر من الطلب و تنزل البورصة بناء على هذا البيع الكبير

3-تالت حاجة و دى منطقية جدا ان لما تحصل الحاجات اللى انا قولت عليها دى كلها طبعا الاسعار بتنزل نزول غير عادى فيؤدى دة الى اية؟ حالة خوف و فزع بين المستثمرين تكتر الاشاعات تقوم الناس اللى قلبها ضعيف تبيع كل اللى معاها بهدف التقليل من الخسارة و دة طبعا بيزيد الطين بلة (الحمد للة انا مش من الناس دى)

وطب اية الحل؟................................... بص يا سيدى
قبل ما قوللك الحل لازم نفرق مابين فرضين...
اولا: حالة ما اذا كنت انت لسة شارى اسهم قبل ما تنزل بيوم ..يعنى انت اشتريت باعلى سعر..شوف انت بقى ظرفك لو انت محتاج الفلوس فبيع بسرعة اما لو مش محتاجها فبيع جزء و سيب الجزء التانى . والجزء اللى انت بيعت بية اشترى الاسهم و هى نازلة لان كدة كدة الهبوط دة بيبقى لية نهاية و فى نهايتة بيكون الصعود سريع و قد يكون مضاعف
ثانيا: لو انت شارى من فترة و حققت ارباح بس لسة مابيعتش فاحسنلك بيع كلة و اشترى بكل راس المال الاسهم بعد هبوطها او كما يقال اشترى من تحت يعنى من اخر سعر هبط الية السهم
و طبعا فى معلومة لازم الكل يكون عارفها و انا باكد عليها دايما ....
-اى سهم على المدى البعيد بيزيد.طالما ان الامور السياسية و الامنية مستقرة و طالما ان السهم اللى بيضارب فية شركتة شغالة كويس ومش مفلسة ولا عليها ديون

و اتبع نظرية المرجيحة فى البورصة المصرية الا و هى :
البورصة عاملة زى المرجيحة مرة فوق و مرة تحت.....
....................................
وهذا الموضوع الذى قام بشرحة احد اصدقائى فى دبلوم العلوم الاقتصادية ......له جزيل الشكر وشكرا على مساعدتة لى.