من لحظه السحب الى الكشف الطبي بالنيابه الاداريه

الى احلى منتدى::::
جبتلكم معلومات من بدايه سحب الملف الى نزول التحريات يا رب كلكم تستفيدوا منها ودا اللي حصل مع دفعه 2006 بالتفصيل :
أولاً:- السحب والتقديم
أ- ميعاد السحب

يوم ...حسب الواردفى الاعلان... ان شاء الله هتروحوا تسحبو الملف وسعر الملف 50 جنيه وميعاد السحب هيبقى من يوم ...حسب الاعلان........الى يوم ......حسب الاعلان... ودا نفس ميعاد التقديم أى انك خلال هذه المدة تسحب الملف وتقدمه

ب- محتويات الملف

حضرتك بعد ماتسحب الملف ستجده مكون من الاتى :-
1- طلب تعيين باسم السيد المستشار رئيس هيئة النيابة الادارية
2- وثيقة تعارف لمرشح عضو نيابة ادارية (مكونة من ورقة واحدة تملأ بمعرفة المرشح)
3- وثيقة تعارف لجميع العائلة حتى المعارف ان وجد( وطبعاً يتكتب فيها أضل المعارف من حيث المركز الاجتماعى على شرط ميكونش من اللى مكتوبين قبل ذلك فى الاقارب أو الاصهار) ودى طبعاً بتيكون فيها خانات للأقارب وأزواجهم بالتفصيل فيراعى الدقة وعدم الشطب لذلك صور الوثيقة صورة واملأها اولاً ثم انقل منها فى الأصل وبعد كده صور الأصل صورتين عشان هيخدوهم منك ( ومتنساش صور صورة لنفسك عشان ان شاء الله لما تجيلك تحريات تبقى تراجع بياناتك منها لأنك هتتسأل فيها هناك أسألة خفيفة كما سيأتى لاحقاً )
ج- التقديم
هتروح تقدم الملف بتاعك على أقصى تقدير يوم .....أخر يوم فى الاعلان...... الموظف اللى هيستلم منك الملف يراجعه وهيديك وصل صغير بالاستلام فيه تاريخ الاستلام وهيقولك تيجى يوم كذا تعرف ميعاد المقابلة الشخصية بتاعتك


ثانياً : المقابلة الشخصية

سوف تتفضل مشكوراً وتروح فى اليوم اللى الموظف هيقولك عليه تيجى تعرف يوم امتحانك فيه (وده فى نفس المكان اللى انت سحبت وقدمت فيه الملف) هتلاقى طابور طويل من الدور الثانى الى الشارع تقف فيه الى أن يأتى عليك الدور وتدخل هتلاقى كشوف متعلقة على الحيط تشوف فين الكشف الخاص بجامعتك وتروح عليه تعرف انت امتحانك يوم كام والساعة كام واللجنة رقم كام ورقمك فى اللجنة بتاعتك كام تتفضل مشكوراً تروح وتيجى فى يوم الامتحان (المقابلة الشخصية )واللى هيكون عنوانه ( 5 شارع ذكى _ التوفيقية_أمام سنترال رمسيس ) روح والف مين يدلك العنوان ميتوهش .






تطلع الدور الرابع على ما أذكر هيتم ترتيبكم والمناداة على الاسماء وأخذ البطاقة من كل واحد وتجميعكم فى دفعات 6ب6 تدخلو على اللجنة ( نصيحة من أخ ) أهم حاجة فى المقابلة الاعصاب الهادئة الاسئلة سهلة جداً (أهم حاجة ذاكر الاسئلة اللى موجودة على المنتدى بس وان شاء الله مش هتخرج عنها وكل الاعضاء اللى فى المنتدى هيأكدولك الكلام ده) بعد الاعصاب الهادئة والاسئلة اللى على المنتدى المظهر العام ان لم يكن هو رقم 1 فى المقابلة ثم اللباقة وحسن الرد على السؤال بمعنى ان المستشاريين هيركزوا فيك على الاتى :-
مظهرك وطريقتك وانت داخل وطريقة جلوسك ( يعنى مثلاً متقعدشى على طرف الكرسى ولا تحرك يدك كثيراً أثناء الاجابة وهكذا يعنى لا تتوتر)
اسلوبك فى الرد على السؤال وطريقة اجابتك وفهمك للسؤال حتى لو مجوبتش صح المهم ازاى هتقدر تخرج من المأزق وتقدر تقنعهم باجابتك ولو معرفتش الاجابة أوعى تسكت حاول تجاوب على قد مفهمت السؤال بس متلخبطش الامور فى بعضها جاوب ولو اجابة قريبة من السؤال وبالتوفيق ان شاء الله
وبعد كده الانتظار لحين نزول تحريات واللى ان شاء الله مش هتغيب يعنى حوالى شهر شهر ونص شهرين بالكتير


ثالثاً :- نزول التحريات (بدأنا فى الجد)
بعد المقابلة سيتم اختيار الاخوة والاخوات اللى تم اجتيازهم للأمتحان فى المقابلة لنزول تحريات لهم ( أمن دولة وجنائى واللى هنفصل بيحصل فيهم ايه ان شاء الله) تمهيداً لاختيار الصفوة منهم للكشف الطبى ان شاء الله .


أولاً:- تحريات أمن الدولة

بعد ماحضرتك تنجح فى الاختبار الشخصى ان شاء الله بيتم ارسال ملفك لمكتب الامن بوزارة العدل واللى بدورها بتقوم بارسال نسخة من الوثيقة (اللى حضرتك مليتها بنفسك وصورتها صورتين) لأمن الدولة والنسخة الثانية لمصلحة الامن العام.
هيتصل بيك أمين الشرطة بتاع أمن الدولة اللى حضرتك تابع لدائرته وهيقولك حضرتك تشرفنا النهاردة أو بكرة على أقصى تقدير ( هما مبيكتروش علن كده) لأن حضرتك ليك تحريات نيابة ادارية عندنا وتجيب مع حضرتك صورة من الوثيقة اللى انت قدمتها فى الملف (زى ماقولتلك صور لنفسك صورةعشان كده) وصور جميع مستندات الممتلكات اللى انت قدمتها مع الملف والاصول للأطلاع (وخد معاك كمان ورق فلوسكاب كفاية وقلم لأنك هتنقل الوثيقة كلها تقريباً من جديد بخط ايدك) تعمل اللى هيقولك عليه وتروح فى الميعاد المحدد وطبعاً معاك البطاقة بعد متخلص كتابة هيدخلك للضابط عشان يسألك شوية أسألة فى الوثيقة بتاعتك واللى دائماً بتكون عن الاشخاص اللى لهم ملفات فى أمن الدولة من أقاربك ولو مفيش بيسألك أسألة روتينية عشوائية عن بعض أفراد العائلة أو المعارف اللى موجودين فى الوثيقة وبس خلاص بيقولك أتفضل مع السلامة وبالتوفيق ان شاء الله وبتاخد بطاقتك وتمشى وبعدين نرجع تانى للأنتظار لكن المرة دى مش كتير اسبوع ولا اثنين وتلاقى المباحث بعتالك (استر يا رب)


ثانياً:- تحريات المباحث
بيتصل بيك الخفير أو أمين الشرطة أو الموظف المختص بالتحريات فى المباحث وبيقولك هتجيلنا الساعة كذا يا حضرتالاسلوب مختلف تماماً عن أمن الدولة (وتجيب معاك الاوراق بتاعتك) بتروح فى الميعاد المحدد لك وهناك هتلاقى المستخبى بان يا معلم كل واحد فى اللى اتكتبو فى الوثيقة كان عليه أى حاجة ياباشا مصلحة الامن العام بتبعت بيه ورقة كبيرة مكتوبة على الكمبيوتر باللى عليه من أحكام للتحرى عنها الموظف هيقولك روح صورلنا دى نسخة ( النسخة الثانية من الوثيقة اللى انت كنت مصورها وفيها جواب مصلحة الأمن العام اذا كان أحد من الاقارب عليه حكم ولا حاجة ) بتصورها وترجعله وبقى صور جواب المصلحة(ان وجد) كمان نسخة ليك هتنفعك بعد كده ويا اما يعملك التحريات بتاعتك وانت واقف وتخلص يا أما بيقولك هيجيلك أمين شرطة المباحث للتحرى عنك وعن الاشخاص اللى فى الوثيقة ( وأسيبلك انت بقى تكتشف اللى بيحصل فى الفترة دى بنفسك عملى يا باشا)

رابعاً:- مرحلة ما بعد التحريات ( الانتظارثم الانتظار ثم الانتظار )
بعد متخلص التحريات بتاعة المباحث وأمن الدولة بيبعتو هما بقى التحريات دى على ضوء ما أسفرت عنه للوزارة(مكتب الامن العام بوزارة العدل مرة أخرى) واللى بدورها بتبعت التحريات مع الملف مرة أخرى للهيئة كى تربط الملفات بالرباطة الحكومية الشهيرة الى أن يأذن الله لها أن تفك ويتم النظر فيها للأختيار منها الاشخاص اللى هيتم نزول كشف طبى لهم ان شاء الله ودا طبعاً بعد استبعاد المحظورين أمنياً واللى تحرياتهم كانت سيئة

خامساً :- الكشف الطبى (الف الف مبروك ياباشا)
ادعولى ربنا يوفقنى وينزلى كشف طبى وانا هبلغكم ان شاء الله بيحصل فيه ايه بالظبط (اللى أعرفه عن الكشف الطبى ان أحد المستشاريين بيتصل بيك وبيقولك الف مبروك حضرتك قبلت فى النيابة الادارية وهتيجى يوم كذا الساعة كذا عشان تكشف طبى وهيقولك على المكان فى دفعة 2006 قالو لناس تيجو فى نفس مكان المقابلة وناس فى مصلحة الطب الشرعى وده كان بالليل والكشف بيكون عينة بول فقط للكشف عن المخدرات واللى بيكون فى مصلحة الطب الشرعى بالوزارة) وبالتوفيق ان شاء الله


سادسا:-نزول اسماء المعينين فى الجرائد (الرسمية (والله الف مبروك ياباشا بس متنساناش وربنا يقدرك ويعينك على أداء مهامك الوظيفية على أكمل وجه )

بعد كده بيتم التنسيق مع الاعضاء الجدد على ميعاد حلف اليمين واستلام الكارنيهات والذى منه
أود انى أكون قدمت ولو أستفادة بسيطة جداً للأعضاء الجدد ان شاء الله.

أسألكم الدعاء لى بالتوفيق وبكل خير والقبول فى النيابة الادارية ان شاء الله
ويارب بالتوفيق للجميع

مشكورة جدا يا جوجو

العفو على ايه يا استاذ محمود
ده اقل واجب اعمله مع احلى واجمد منتدى
لاني استفدت منه كتير جدا لان مفيش اي عضو بيبخل على التاني فى اي معلومه بيعرفها وشكرا لردك على الموضوع

انا عضو جديد واتمني اكون خفيف الظل عليكو وبشكركو ع المعلومات الجاده دي وحبيت اضيف ان يوم 24 من الشهر دا هاتبدا مواعيد الجامعات حسب الترتيب واي معلومات انا في الخدمه

ربنا يوفقك يا استاذ امجد وطبعا كلنا بنحتاج لبعض

تسلمى ياجوجو ياحبيبتى على المجهود الجميل دا

شكرا ليك استاذ امجد بالتوفيق للجميع ان شاء الله

شكرا ليكم ولكل المنتدى ونورتوني ويا رب تكونوا استفدتوا
وطبعا استاذ امجد احن تحت امر المنتدى وهتلاقي كل اعضاؤه دايما مع بعض مش بيبخلوا على بعض ابدا
وشكرا جزيلا ليك ولكل اللى نوروني فالموضوع

شكرا على المجهود الرائع

لقد ذكرت ان اسلوب نحريات المباحث يختلف تماما عن امن الولة فهل هذا الاختلاف للاحسن ام للاسوء!!!

هل ابناء المستشارين يمرون فعلا بهذة المراحل ولا بتكون التحريات عنهم سهلة!!!

أكرمك الله واكرمنا بالتعيين
جزاك الله خيرا

ابناء المستشارين يمرون بنفس التحريات ومنهم على فكرة لا يقبل لسوء التحريات
وفيه قضاسا شهيرة جدا لابناء مستشارين ترفضوا بسبب التحريات

وبالنسبة لتحريات القمس هى قصدها علشانالناس بتجيلك البيت وبتظبط وكده يعنى
لكن امن الدولة انت مش بتقابل امين شرطة
انت بتقابل رئيس مطكتب امن الدولة شخصيا
ظاااااااااااااااابط كبير يعنى؟؟؟؟؟؟؟

بالتوفيق

ربنا يوفقكم يا رداله

طب لو انا نسيت اكتب حد من الاقارب هما بيجيبوة ولا التحريات على انا كتبته بس