حوار بين حفيده وجدتها عام 2052

المكان : احد احياء القاهرة
الزمان : يوم من ايام صيف عام 2052
الحوار بين : حفيدة فى سن المراهقة ( 12 سنة ) تجلس مع جدتها ( 70 سنة ) و يدور بينهما حوار
-----------------------------------------------------------
الحفيدة : تيته ميرو.....بقالى زمان مقعدتش معاكى
الجدة : و هو انا عارفة اتلم عليكى خالص.....ده انا قاعدة زهقانة قوى و مش لاقية حاجة تسلينى
الحفيدة : و مبتفتحيش الدش ليه يا تيته
الجدة : التليفزيون بقى ممل خالص مفيهوش غير 9700 محطة بس !.....و انا كمان مش بعرف اغير المحطات !
الحفيدة : و ايه الحلاوة دى ؟ حلو البادى اللى لابساه ده.......بس ده موضة قديمة اوى يا تيته !
الجدة : يا بنتى انا ست دقة قديمة و بالبس زى ما جيلنا الصاعد اتعود و حسب التقاليد القديمة بتاعتنا
الحفيدة : ايوة بس مش حاسة انك مخنوقة و انتى لابساه ؟

الجدة : ابدا ده هو ده اللبس المحتشم الى مفروض الكل يلبسه و يحافظ عليه ...... فين اايه....كان فيه حاجة اسمها اخلاق
الحفيدة : معقول يا تيته ؟ للدرجة الفظيعة دى !!؟
الجدة : امال انتى فاكرة ايه....و بعدين كانت الست من دول ما تلبسش اللبس الخليع بتاع اليومين دول...يعنى الجيبة كان ميقلش طولها عن شبر و نص ...و كانوا الستات يلبسوا فوقيها بلوزة باستمرار....مش زى دلوقتى ! حسبى الله و نعم الوكيل !
الحفيدة : يا خبر...و ايه كمان يا تيته
الحفيدة : ياه يا تيته....ده انتوا كان ليكم تقاليد غريبة خالص !
الجدة : و هو انتى فاكرة ان ايامكم دى ايام ؟ يا بنتى ايامكم دى ما يعلم بيها الا ربنا.....فين ايام سنة 2002 هى الواحدة كانت تستجرى تشرب سيجارة البانجو و لا تسحب لها سطر بودرة قدام ابوها ؟ طب الدنيا كانت تتقلب ساعتها و ما تتعدلش...امال : حقول لك ايه يعنى خدى عندك مثلا.....زمان كنا نسمع الطرب الاصيل لمطربين حقيقيين زى مصطفى قمر و عمرو دياب و طبعا سيدة الغناء شاكيرا و كانت الاغنية مدتها اكتر من ديقتين متواصلين من الطرب الاصيل و الموسيقى الهادية.....الراسمالية الى تعمر النافوخ بصحيح كانوا مطربين روشين و اخر طحن و حسبى الله و نعم الوكيل !
الحفيدة : و بعدين يا تيته
الجدة : و بعدين كنا نسمع على حاجة اسمها اسطوانات ليزر و دى صحيح انقرضت بس كان ليها طعم عن دلوقتى يا سلام لما كنا نحطها فى الوكمان و نعلقها فى حزام البنطلون كده و نمشى فى الشارع كده كانت ايام جميلة حسبى الله و نعم الوكيل !
الحفيدة : حكاويكى ممتعة اوى يا تيته .....ثانية واحدة بس اما اصحى سمسم صاحبى فى المدرسة لانه بايت معايا فى الوضة من امبارح.....اصل الانسان الالى بتاع الصحيان بايظ و لازم نصلحه انهاردة
الجدة : طيب يا حبيبتى روحى
( بعد دقايق )
الحفيدة : هيه يا تيته....و بعدين
الجدة : احلى ايام بقى كانت ايام الدراسة الفصل كان على ايامنا رايق و عدد التلاميذ فيه ميزدش عن ستين سبعين تلميذة و كنا ساعتها بنعرف نفهم الدرس كويس مش زى دلوقتى و كانت الشوارع ايامها فاضية يعنى كانت اشارة المرور تقعد ساعة الا ربع بس لان مصر كان تعدادها 85 مليون مش اكتر تخيلى بقى الروقان الى كنا فيه ؟ حسبى الله و نعم الوكيل !
الحفيدة : 85مليون بس؟!!
الجدة : امال ايه....عشان كده كانت كل حاجة رخيصة يعنى مثلا كيلو اللحمة يوم ميضرب الدم كان يبقى بخمسة و ستين جنيه او سبعين و كان اتخن جوز جزمة ب 250 جنيه بس و كان الواحد يقدر يشترى شقة تمليك ب 150 الف جنيه بس ....و كان الدولار ب 5 جنيه بس تخيلى بقى ؟
الحفيدة : مهو عشان كده الجواز على ايامكم كان سهل خالص احنا بقى خلصنا من العقد دى
الجدة : امال ايه ....ده احنا الواحدة مننا كانت الواحدة مننا تفكر تتجوز من و هى 17 سنة عرفى ده احنا على ايامنا كان لا يمكن البنت تتاخر عن الساعة 4 الفجر طب ده باباها كان ممكن يخاصمها !
الحفيدة : ياى ! ده انتو صعبين خالص يا تيته !!!
الجدة : ده احنا اتربينا على الاخلاق و الفضيلة
( تمسك الجدة بتليفون محمول فى حجم علبة الكبريت )
الحفيدة : حتكلمى مين يا تيته
الجدة : الجزار اصلى موصياه على لحمه و مدياله 600 دولار عربون
الحفيدة : ( تنهض من مكانها ) تشاو سى يو تيته !
الجدة : سى يو
( و بعد مرور ساعات من غياب الحفيدة رجعت لتكمل الحوار )
الجدة : انتى كنتى فين انا زهقت من القاعدة لوحدى يا فتفت ؟
الحفيدة : افتحلك الاخبار
الجدة : اوكى
( الفيدة تفتح شاشة كبيرة بالحيطة )
المذيعة : هاى شلة ! اليكم العناوين
الاخبار العربية :
اسرائيل ترفض الانسحاب من البصرة الا بعد ضمان امن مستوطناتها فى بغداد
اشتباكات على الحدود الاسرائيلية المغربية
الاخبار الفنية :
زفاف المطربة صباح على حفيد الفنان الراحل راغب علامة
رئيس قطاع الانتاج لم يستقر بعد على بطلة فوازير رمضان و يعقد اجتماع مع السيدة توتى محمد صفوت الشريف وزيرة الاعلام
المذيعة : فينش باى
الجدة : لأ بقى حسبى الله و نعم الوكيل ! ( يغمى عليها )
الحفيدة : تيته...........تيته

عرفت منين انه لذيذ يا منوفى
انت دقته
هههههههههههههههههههههههههههههه
هههههههههههههههههه
هههههههههه
هه

كل بعقلى حلاوه كل
ماشى ماشى