كل شيىء عن دبلوم القضاء الادارى

الحمد لله والشكر لله الذى وفقنا فى الحصول على اكبر قدر من المعلومات عن دبلوم القضاء الادارى الذى اعلن عنة اخونا المدير العام منذ ايام قليلة .

تم السؤال ووصلنا للمدير المسؤل عن هذة الدبلوم واليكم التفاصيل الاتية

1_الدبلوم يسمى دبلوم القضاء الادارى .
2_ الدبلوم على ترمين وكل ترم 5 مواد دراسية .

3_ تم تعديل ميعاد المحاضرات واصبح يوم السبت من الساعة 11 صباحا الى الساعة 6 مساءا وسيتم دراسة ثلاث محاضرات فى هذا اليوم على يد المستشار محمد ماهر ابو العنين , والمستشار احمد صبرى شقور , والمستشار احمد هانى الدرديرى.
و اصبح ايضا يوم الثلاثاء من الساعة 2.30:4.30 , ويوم الاربعاء من 2.30:4.30 اى الدراسة ستكون يوم السبت والثلاثاء والاربعاء فقط.اى ان المحاضرة ساعتين فقط.

4_ الى هيدرس فى الدبلوم عبارة عن 4 مستشارين كبار اوى وهم المستشار محمد ماهر ابو العنين , والمستشار احمد صبرى شقور , والمستشار احمد هانى الدرديرى ومازال اسم المستشار الرابع تحت الدراسة بالاضافة الى مادة من الخمس مواد سيدرسها عميد كلية الحقوق.

5_ المبلغ للدراسة هو 1200 جنية للترم الاول , ولم يتم تحديد رسوم الترم الثانى حتى الان ومحتمل ان تكون ب1200 او 1500 جنية

6_والتسجيل سيكون فى الدور الثالث بجامعة القاهرة بالملحق الجديد بجوار جامعة انديانا .
7_ الدراسة تبدأ يوم السبت القادم دا يعنى يوم16/4 وتقريبا الفصل الدراسى سيكون لمدة 4 شهور .

8_ يحق للطالب الرسوب فى مادتين ويدخل فيههم ويكمل عادى ولكن الى يشيل 3 مواد يبقى سقط.
9
_ الورق المطلوب هو شهادة اليسانس وصورة بطاقة شخصية .

10_ الى هيتقدم لهذة الدبلوم هم دفعة 2008 و2009 و2010 واعضاء من النيابة الادارية , وايضا سيكون هناك اعضاء من الشرطة سيدرسونها .

11_ الامتحان سيكون مادتين تحريرى , وثلاث مواد شفوى , بالاضافة الى بحث فى الدبلوم لازم تعملة.

12_ هذة الدبلوم لا تعادل الماجستير , ولو انت معاك دبلوم اخر وخدت دى مش هيكون معاك ماجستير .هذة الدبلوم دبلوم تطبيقى(((( شبة الدورات كدا)))).

13_ هذة الدبلوم معيار افضلية فقط وليست شرط للتعين حتى الان

14_ تم مد فترة التسجيل اسبوعا اخرا ليكون اخر يوم هو يوم الخميس القادم الموافق 14/4 .

15_ حتى هذة اللحظة عدد المسجلين جميعا لا يتعدى 200 شخص .

16_ الدبلوم دى كدا كدا لاعضاء النيابة الادارية هيخدوها لما بيكونوا شغالين فى النيابة الادارية ولكن اعضاء النيابة الادارية بيخدوها بلاش او بيتم عمل دعم لهم .
يعنى من الاخر النيابة الادارية مش عايزة تصرف فلوس على الجيل الجديد الى هيدخلها , وبتوفر فلوسها من دلوقتى وبيخلوا المرشحين للنيابة الادارية يخدوها على حسابهم.

17_ الحضور اختيارى الان

18_ سيعقد الامتحان يوم13 او 14 او15 شهر 8 ان شاء الله,والكثر احتمالا انة سيكون يوم 15/8 بأذن الله

ملحوظة: يرجى مراجعة اصل الموضوع بأستمرار وذلك لان يوجد اضافات فى الموضوع.

نسألكم الدعاء يا شباب , ربنا عالم بنجيب المعلومات بشق الانفس بجد.

اسألكم الدعاء يا شباب .
خصوصا ان مشقة السفر بالطريقة دى هتمنعنى من التقديم فيها.
وتمنياتى للجميع بالتوفيق واى استفسار انا موجود وتحت امركم جميعا , ولا تنسونا بدعائكم دائما وربنا يوفق الجميع

شكرااااااااا ليك يا استاذ ثعلب بجد احنا متشكرين ليك جداااا
وان شاء الله نتقابل ونتعرف على بعض فى الدبلومه دى

اولا انا بشكر الثعلب العربى على مجهودة وتعبة معانا وان شاء الله ربنا هايجزية كل خير
ثانيا فعلا الدبلومة دى تعجيز ودى معمولة لبتوع القاهرة فقط وخصوصا كمان ان المحاضرات بليل حسبى الله ونعم الوكيل

لازم يا جماعة كلنا نقاطع الدبلومة دى عشان كل الناس ايلى من خارج القاهرة هاتتعرض لظلم جامد جدا وخصوصا كمان ان المحاضرات بليل وفى ناس كمان من داخل القاهرة هاتقاطع الدبلومة دى تضامنا مع الناس ايلى من خارج القاهرة

طيب والا بيعمل دبلومه دلوقتى يعمل ايه وازاى ياخد الاتنين مع بعض

تقدمش

سورى قصدى متقدمش

يا جماعه الدبلومه دى حرام بكل المقاييس وماينفعش انها تتم او تتنفذ باى شكل من الاشكال ولازم كلنا نشتكى ونوصل صوتنا للمسئولين عشان يعرفوا مدى انحيازها لطائفه معينه وهم سكان القاهره فلازم كلنا نشتكى ونرفض
ياجماعه ده ايميل العاشره مساءا ياريت كلنا نشتكى ونكتب شكوانا فيه ليشعروا بالاهميه
[ندعوك للتسجيل في المنتدى أو التعريف بنفسك لمعاينة هذا الرابط]
والله ولى التوفيق

بالنسبة للحضور فالقرار النهائى لم يصدر فيها حتى الان ومحتمل معرفتة بكرة صباحا ان شاء الله.
ولكن جامعة القاهرة بصفة عامة بتعمل الزام للحضور 70% اصلا .


وبعدين حبة اسئلة لكل من يفكر فى التسجيل ولا اقصد الاهانة او الاساءة او الترهيب او اى شيىء اخر ولكن مجرد تفكير سوا مش اكتر .

هل انت ضامن ان تنجح فى اختبارات معدة خصيصا وزمايلك فيها هيكونوا وكلاء نيابة ادارية؟
السؤال الاخر : هل تضمن انك تعدى من امتحان الشفوى الذى سيكون فى 3 مواد ؟؟؟.
السؤال الاخير بقى: هل تعلم انها معيار افضلية فقط وليست كشرط الزامى , وهل تعلم ان دورة icdl تعتبر معيار افضلية برضوا .

على العموم دى مجرد اسئلة علشان نفكر سوا مش اكتر ولا اقل .

ربنا يوفق الجميع , وانا شخصيا السفر هيكون مشقة عليا وبينى وبين القاهرة مسافة كبيرة اوى ,علشان كدا قرار ان بنسبة 99.9% مش هسجل حتى الان واعتقد ان دا هيكون القرار النهائى واهو مدنى لنفسى فرصة لغاية بكرة بالليل يمكن اغير رأيى ولكن اعتقد انة نهائى.

pogar كتب:

طيب والا بيعمل دبلومه دلوقتى يعمل ايه وازاى ياخد الاتنين مع بعض

عادى تاخدها عادى لان الامتحان هيكون فى شهر 8 , اما الدبلومة العادية هيكون فى شهر 6 والشفوى فى 7 , وبعدين يوجد دور 10 للدبلوم الى فى الجامعة العادى( الاكاديمى )) , والدبلومة دى (( التطبيقية)) يوجد من حققك الاعادة فى مادتين .

يعنى ممكن تظبطتها وتنجح فى مايو او تأجل لاكتوبر او تنجح جزءئ من مايو وتاجل مادة لاكتوبر و تنجح فى 4 او 3 مواد فى التطبيقى وتأجل 2 الى شهر 9 مثلا او نهاية 8

مسبوط كلامك يا مودى وكمان كلامك يا ثعلب لازم الكل يحطة فى اعتبارة قبل ما يسجل انا مش فاهمة لية القررات التعسفية دى ما كان عملها فى كل الجامعات وكلنا كنا هانخودها انا مش فاهمة اية المطلوب من كدة بالضبط

شكرا للعضو الثعلب العربى ياريت يا جماعة نتفق على حاجة واحدة وهى اما نقاطع هذة الدبلومة او نشترك فيها .
وهل الواحد بيشترى سمك فى ميه مش لما يعينونا الاول فى النيابة يبقوا يعطونا دورات ودبلومات تدريبية ثم ان هذا الموضوع غير مقبول كانوا قالوا لنا قبل التقديم او يعلنونا فى الاعلان اللى نزل فى الجرائد كشرط للتقديم لكن كده احنا مش فاهمين حاجة.
ما فى قبل دفعتنا 2009 دفعات كثير دخلت النيابة من غير هذة الدبلومة .
ولا هذة أفتكاسة للتعجيز!!!!!!!!!!!!!!!!!!!!!!!!!!!!

ياريت يا جماعة اى عضو هيسجل فى هذة الدبلومة ياريت يعرفنا ايه نظامها وأسمها ايه بالضبط
وماذا حدث معه عند التقديم
وقدم فين بالضبط والتفاصيل كلها ايه
أرجو الرد سريعا ارجوكم قبل يوم الخميس 7/4/2011

تم مد فترة التسجيل اسبوعا اخرا ليكون اخر يوم هو يوم الخميس القادم الموافق 14/4

ويوجد اجتماع غدا بحث ان يكون الحضور اجبارى ام اختيارى .


نسألكم الدعاء يا شباب , ربنا عالم بنجيب المعلومات بشق الانفس بجد.

ربنا يكرمك يا ثعلب يارب ويجازيك كل خير على ايلى بتعملة معانا ويجعل نصيبك فى هيئة قضائية يارب

انا روحت النهارده جامعة القاهرة علشان اتأكد من الموضوع ده والوضع كالتالي :-

تعلن كلية الحقوق - جامعة القاهرة عن بدء التسجيل في دورة التأهيل الخاصة بأعضاء النيابة الادارية ابتداءا من يوم 27-3-2011 ولمدة اسبوع علي ان تبدأ الدراسة في الدورة من يوم 9-4 - 2011 .

فالامر كله لا يتعدي مجرد دورة وليست دبلومة ولاعضاء النيابة الادارية فقط ضمن منظومة التأهيل الذي وضعها رئيس الهيئة الحالي تيمور فوزي وليس للمرشحين اما بالنسبة لدبلومة القانون و القضاء التأديبي اللي تحدث عنها رئيس الهيئة كمعيار افضلية فقد افادت موظفة الدراسات العليا بانها لم تفتح بعد للقيد فيها ولم يأتي بها اي اشعار من هيئة النيابة الادارية .

والله الموفق

ازاى يعنى الكلام ايلى حضرتك بتقولة دا اذا كان الدبلومة دى لاعضاء النيابة الادارية ودفعات المتقدمين بداية من 2008 ودى معلومات وصل لها الثعلب العربى ومن مصادر مسئولة عن الدبلومة دى
والله الواحد قرب يتجنن

elham salah كتب:

ازاى يعنى الكلام ايلى حضرتك بتقولة دا اذا كان الدبلومة دى لاعضاء النيابة الادارية ودفعات المتقدمين بداية من 2008 ودى معلومات وصل لها الثعلب العربى ومن مصادر مسئولة عن الدبلومة دى
والله الواحد قرب يتجنن

والله يا استاذة انا مش بألف ولا بجيب كلام من عندي ووالله كل اللي كتبته ده انا روحت النهارده وسألت بنفسي والله علي ما اقول شهيد .

وبالنسبة لجزئية ان الاستاذ الثعلب العربي فأنا مش شككت في كلامه ولكن كل ما في الامر اني حبيت اوضح ان حصل خلط بين دبلومة القضاء التأديبي اللي لسه متفتحش اصلا وبين الدورة اللي موجودة بالفعل لتأهيل اعضاء النيابة الادارية وهي دي اللي موجودة بالفعل هناك ومتعلق بيها اعلان كبير الحجم في مدخل الكلية وعموما انا حبيت اوصلكم اللي اعرفه من باب الامانة ومن باب توفير المشقة علي الزملا الافاضل اللي من اماكن بعيدة وميقدروش يسافروا القاهرة وربنا يوفق الجميع .

MeShOoO كتب:

انا روحت النهارده جامعة القاهرة علشان اتأكد من الموضوع ده والوضع كالتالي :-

تعلن كلية الحقوق - جامعة القاهرة عن بدء التسجيل في دورة التأهيل الخاصة بأعضاء النيابة الادارية ابتداءا من يوم 27-3-2011 ولمدة اسبوع علي ان تبدأ الدراسة في الدورة من يوم 9-4 - 2011 .

فالامر كله لا يتعدي مجرد دورة وليست دبلومة ولاعضاء النيابة الادارية فقط ضمن منظومة التأهيل الذي وضعها رئيس الهيئة الحالي تيمور فوزي وليس للمرشحين اما بالنسبة لدبلومة القانون و القضاء التأديبي اللي تحدث عنها رئيس الهيئة كمعيار افضلية فقد افادت موظفة الدراسات العليا بانها لم تفتح بعد للقيد فيها ولم يأتي بها اي اشعار من هيئة النيابة الادارية .

والله الموفق

يا باشا الموظف الى انت سالتة دا اما مش عارف اما بيتوهك .
المعلومات التى ذكرنها هى الصحيحة وتم مد فترة التسجيل للأسبوع القادم, ومعلوماتى بجبها من سكرتارية العميد ومن مدير الدبلوم كمان , ومن دكتور فى الكلية هناك , يعنى الموظف الى انت سالتة دا ردة غريب , وتمنياتى لك بالتوفيق

تم تغيير ميعاد محاضرة يوم الاربعاء من الساعة 6:8 الى الساعة 7:9
وستكون دائما من 7:9 , واى جديد سيتم اضافتة اول باول وبالون الاحمر فى الموضوع الاصلى , وايضا اضافتة فى الردود.

تحياتى للجميع وبالتوفيق للجميع

بقولك اية يا ثعلب المحاضرات من 7الى 9 مش شايف انها بدرى شوية انا بقول من 10الى 12 افضل حتى نروح فى حظر التجول احسن