النيابة الادارية دفعة 2009

شكرا ليكم جميعا على الردود الحلوه دي
بجد ميرسي كتييييييير
انا سحبت الملف النهارده وفعلا ماخدش مني دقيقتين
شكرا جزيلا
ودعواتكم لينا بقى بالقبول

هل صحيح ان هناك شرط بان تكون نسبة التقدير حيد ب 70% ولا اية وانا عارف ان المطلوب جيد بس هما بيصفوا للنسبة دى ولا لا ؟؟؟

هو لازم نكتب الاقارب اللي قايلين عليها كلها ولا ممكن نطنش حد

لو سمحتوا انا قرات هنا سؤال عن طلب التعيين اللى باسم رئيس هيئة النيابه
الاداريه

وتم الرد بان الطلب ده بيكون مع الملف وبنملا البينات فقط

بس انا سحبت الملف والملف مش فيه عير الكراسه بتاعه البيانات

ارجو الرد سريعا للضروره

وياريت اللى ساحب ملف يقولى ايه محتويات الملف بالظبط

واذا كان الملف بتاعى مش فيه غير الكراسه ( وثيقه تعارف للمرشح )

كده يبقى الملف ناقص ولا ايه

محتويات الملف

1 وثيقه تعارف لمرشح النيابه الاداريه(كراسه البيانات)

2 طلب تعيين باسم المستشار رئيس هيئه النيابه الاداريه وهيه عباره عن ورقتين ( واحده طلب التعيين والثانيه ملخص لبيانات الاسره التي تم كتابتها في كراسه البيانات)

ed]أخى الحبيب abe el rahman
ممكن اعرف هو كل اللى هيسحب الملف ويقدمة هيتحددلة ميعاد المقابلة ولا ممكن يستبعدو حد
بالتأكيد قد يتم الإستبعاد ... لكن العدد قليلا نوعاً ما ... وهذا الإستبعاد واضح من التنويه الذى تم ذكره فى الملف بخصوص الإرشادات العامة رقم 3 ( 3 - سيعقد اختيار شفوى برئاسة الهيئة بالتوفيقية لمن تتوافر فيهم الشروط وتعلن أسماؤهم فى كشوف بذات الجهة التى تم سحب الملف منها. ) وهذا بخصوص الذين لم تتوافر فيهم الشروط فقط ... فهو مازال لم يقيمك حتى يستبعدك ... فقط مالاتتوافر فيه الشروط ...

أخى الحبيب aly2020
يعني معني كده ان مش كل الي سحب الملف هتنزل اسمائهم في هزه الكشوف الخاصه بميعاد الاختبارات
وايه معني جمله ( لمن تتوافر فيهم الشروط) هل هزه الشروط سريه مثل يختاروا نسبه معينه في المجموع مثلالا يقل النسبه المؤيه للمجموع عن 75% او70% ومؤهلات الوالدين ام ان الشروط المقصوده هنا هيه الايقل التقدير عن جيد
فقط من لاتتوافر فيهم الشروط القانونية التى هى بنص القانون للقبول فى الوظيفة ... وليس الشروط الخفية الغير مطبقة بشكل صريح ... إنما من لاتتوافر فيه شرط من الشروط المعلنه كالتقدير الذى يقل عن جيد مثلاُ ....

[

حضرتك بتقول مثل شرط ان يكون التقدير جيد هل في شروط ثانيه غير التقدير جيد والدفعه 2009 والا يزيد السن عن 30 سنه هيه دي بس الشروط الموجوده في الاعلان
فهل من تتوافر فيه هزه الشروط هينزل اسمه في الكشف يوم 24 ولا في شروط تانيه

ارجو الرد

أختى موني سعد
في اخر الملف مكتوب ملاحضات هامه ايه المقصود بيها وهي 5 بنود
هى ملاحظات يمكنك كتابتها عندما تريدى توضيح شيئ ما قد يكون غامضاً فى بيانات عائلتك وتريدى تفصيله فى ملاحظه ..... أو التنويه عن شيئ لتحسين وضع ملفك ... مثلاً تريدى التنويه بأن لكى ترتيب معين على الدفعة .... وهكذا من الأمور التى قد تصادفك أثناء كتابة الملف ....

أختى jojo
ودعواتكم لينا بقى بالقبول
والله دائما أدعوا للجميع بالتوفيق والقبول ... وبالفعل أطلب من الجميع الدعاء لباقى الأعضاء لما فيه من الخير والبركة ... ولأن الدعاء فى ظهر الغيب للغير يأمن عليه ملك من السماء ويقول ولك بمثل ... فهو دعاء لايرد بإذن الله .... وبالطبع ... نجد أمامنا المثلث العجيب .. الذى يبهرنى بتأثيره على حياة الإنسان ... المثلث هو ... الدعاء والتوكل والإستغفار .... ياله من بصمه واضحه فى حياة كل فرد ... فقط التمسك بهم ...

أخى الحبيب عمرو حمزاوى
هل صحيح ان هناك شرط بان تكون نسبة التقدير حيد ب 70% ولا اية وانا عارف ان المطلوب جيد بس هما بيصفوا للنسبة دى ولا لا ؟؟؟
لا أخفى عليك ... هو بالفعل شرط ولكنه كشرط مؤهل الوالدين ... أى أنه شرط مرن وخفى ... فليس قاعدة ثابته وغير معلن ... لكنه يطبق بشكل واسع نوعاً ما ...

أختى orkedia
هو لازم نكتب الاقارب اللي قايلين عليها كلها ولا ممكن نطنش حد
ما أسهل عدم كتابة ما لاتريديه من الأقارب ... لكن الأسهل من ذلك بكثير هو معرفة من أخفيتيهم أثناء التحريات .... فالتحريات تأتى على من كتبتيهم ومن لم تكتبيهم ... وكيف ذلك ... هناك جهاز مسجل بأسماء كافة الأفراد ... فعندما تأتى لكى التحريات يتم توزيع الملف الذى صورتيه مرتين إلى جهات التحريات التى بدورها تتحرى عنك كل منهم بطريقته ... فتأتى أحدهم للبحث عن الأقارب وصدق المكتوب من حيث المؤهل والوظائف وخلافه ... وأحدهم تأتى لبحث أشمل لترى درجات الاقارب ... وهنا يتم إكتشاف المخفى من الأقارب .... مثلاً .... كتبتى أن لكى أعمام أسمائهم ... محمد أحمد السيد ... و إبراهيم أحمد السيد .... ولكن أثناء البحث يتم البحث من خلال أسم العائلة ... السيد .... فسيجدوا كل من يلقب بلقب السيد .... فيجدوا غير محمد وإبراهيم شخص أسمه عادل أحمد السيد ... من هذا ... هو بالتأكيد من أخفيتيه من أعمامك ... فعندما ينتهوا من التحريات يتم الإتصال بكى لكى تتواجدى فى أمن الدولة للإستفسار عن سبب عدم وجوده من ضمن المكتوبين ... وكذلك أن يطلبوا منك كتابة أقاربك مرة أخرى ... وأيضاً إبلاغك بما أسفرت عنه التحريات لكى يكون لكى حق الرد فى حالة تشابة الأسماء مثلاُ ... فيكون لك الحق فى الإعتراض فتقومى بإثبات التشابه أو الإقرار أنه قريبك فيتم تأكيد ذلك ... المهم ... إذا وجدوا بأن قريبك الذى أخفيتيه عليه قضيه ... فأنتى موضع شك ... وليست محل ثقه ... بكل تأكيد الأمر يرجع للسلطة التقديرية للهيئة ... لكن التقرير الذى ينتهى إليه التحريات يتم الأخذ به .... فكتابة جميع الأقارب مهم ومفيد حتى فى المستقبل ... حيث بعد القبول بإذن الله قد ( بعد الشر ) يقوم أحد بإرسال شكوى بأنك أخفيتى أحد من أقاربك ... فيعود التحرى عن هذا المخفى ... وإذا وجدوه فعلا وعليه قضيه فيكون وضعك سيئ للغاية حتى بعد التعيين لا قدر الله ...

أختى besyans
بس انا سحبت الملف والملف مش فيه عير الكراسه بتاعه البيانات
ارجو الرد سريعا للضروره
وياريت اللى ساحب ملف يقولى ايه محتويات الملف بالظبط
واذا كان الملف بتاعى مش فيه غير الكراسه ( وثيقه تعارف للمرشح )
كده يبقى الملف ناقص ولا ايه
أولاً أهلا بكى فى المنتدى ..
ثانياً الملف ستجديه يحتوى على ( وثيقة تعارف لمرشح نيابة إدارية ) ... وهى كراسة التى ستكتبى بها بيانات عائلتك كاملة ... وبداخلها ورقة من وجهين ... وجهة مكتوب عليه ( وثيقة تعارف لمرشح نيابة إدارية ... تملأ بمعرفة المرشح ) وهى ورقة بها بيانات عائلتك بشكل مختصر وليس بالتفصيل مثل الكراسة ... والوجه الأخر ورقة طلب التعيين حيث مكتوب بها ( السيد الأستاذ المستشار / رئيس هيئة النيابة الإدارية ) ....
إذا وجدتى الورقه ذو الوجهين ... فهو المطلوب ... أما إذا لم تجديها فالملف ناقص ... أذهبى أو أحد من أسرتك إلى القاهرة لمكان سحب الملفات والإبلاغ عن النقص لأخذ تلك الورقة منهم ....

أخى الحبيب aly2020
فهل من تتوافر فيه هزه الشروط هينزل اسمه في الكشف يوم 24 ولا في شروط تانيه
بكل تأكيد إن شاءالله ... فمن يتم تصفيته كما ذكرت هو فقط من لاتتوافر فيه الشروط القانونية التى فى الإعلان ... أما الباقى فإسمه موجود فى الكشف يوم 24/2 بمشيئة الله ... أطمئن ...

بالتوفيق للجيع إن شاءالله

اولا شكرا على ردك

ثانيا انا فعلا الملف بتاعى مش فيه غير وثيقة التعارف فقط

ومش فيه اى طلب تعيين خالص

اعمل ايه دلوقتى ؟؟

ولو رحت المبنى اللى سحنا منه حيرضو يدونى الورقه ولا لا

ارجو الرد سريعا

الاستاذramy kamal بعد اذنك ممكن استفسار بسيط
انا الحمد لله معايا بكالوريوس تجاره 2009 وكان نفسى ادخل اكاديميه الشرطه بس هيا مطلبتش تجاره السنه دى وانا الحمد لله شغال فى شركه كويسه بس انى عشان بحب الشرطه والسلك دى يعنى هل لوذاكرت كليه حقوق اثناء عملى طبعا ممكن يكون ليا الحق فى ان اقدم فى النيابه العامه والاداريه ........الخ زى طالب حقوق العادى ولا مينفعش اسف على الاطاله
ارجو الرد السريع

كنت عايز اعرف هل احنا هنصور الملف دة زى معملنا ف النيابة العامة ولا لا ؟؟؟؟

انا اسف انى سالت السؤال كتير بس حابب اطمن انت عرفت معلومة ان هناك شرط خفى 70% نسبة مئوية اذا وانا اسف بجد على الازعاج

شكرا لك أستاذ رامى ولكل المشرفين
أنا أرتكبت خطأ كبير اثناء كتابة البيانات حيث اننى كتبت 5 من اسماء ابناء العمات فى خانة ابناء الاعمام .....ومش عارف اصحح الخطأ دة أزاي هل انوة عنة فى الملحوظات, وازاى ولا اعمل اية
!!!!!!!!!!
ارجو الرد وجزاكم الله كل خير

انا عندى مشكله كبيره جدا هى وانا بكتب الملف فى حاجات اتكتبت غلط وجيت اصلحها كتبت فوقها بق شكل الملف وحش جدااااا وكمان بابا كتبلى الاقارب فى الخانات الصغيره جدا دى اختصر بشكل فظيع وانا فى ورطه كبيره ومش عارفه اعمل ايه ونفسيتى باظت
انا بفكر اروح اسحب ملف تانى هل الموضوع ده هينفع وله لا ؟
لو سمحت ارجوا الرد بسرعه جدا للاهميه Sad

حسن كتب:: الاستاذramy kamal بعد اذنك ممكن استفسار بسيط
انا الحمد لله معايا بكالوريوس تجاره 2009 وكان نفسى ادخل اكاديميه الشرطه بس هيا مطلبتش تجاره السنه دى وانا الحمد لله شغال فى شركه كويسه بس انى عشان بحب الشرطه والسلك دى يعنى هل لوذاكرت كليه حقوق اثناء عملى طبعا ممكن يكون ليا الحق فى ان اقدم فى النيابه العامه والاداريه ........الخ زى طالب حقوق العادى ولا مينفعش اسف على الاطاله
ارجو الرد السريع

ايوة ممكن بس بشرط ان يكون سنك وقت التقديم لا يتعدى 30 سنة

عمرو حمزاوى كتب:: كنت عايز اعرف هل احنا هنصور الملف دة زى معملنا ف النيابة العامة ولا لا ؟؟؟؟

ايوة هتصوره ثلاثة نسخ

abe el rahman كتب:: شكرا لك أستاذ رامى ولكل المشرفين
أنا أرتكبت خطأ كبير اثناء كتابة البيانات حيث اننى كتبت 5 من اسماء ابناء العمات فى خانة ابناء الاعمام .....ومش عارف اصحح الخطأ دة أزاي هل انوة عنة فى الملحوظات, وازاى ولا اعمل اية
!!!!!!!!!!
ارجو الرد وجزاكم الله كل خير

الافضل تغيرى الملف
روح اسحب ملف تاانى افضل

sona tote كتب:: انا عندى مشكله كبيره جدا هى وانا بكتب الملف فى حاجات اتكتبت غلط وجيت اصلحها كتبت فوقها بق شكل الملف وحش جدااااا وكمان بابا كتبلى الاقارب فى الخانات الصغيره جدا دى اختصر بشكل فظيع وانا فى ورطه كبيره ومش عارفه اعمل ايه ونفسيتى باظت
انا بفكر اروح اسحب ملف تانى هل الموضوع ده هينفع وله لا ؟
لو سمحت ارجوا الرد بسرعه جدا للاهميه

لا مشكلة ولا حاجة يا سونا
انتى ممكن تسحبى ملف تانى مفيش مشكلة

لا حضرت فهمتني غلط انا مش قصدي اخفي حد لان الحمد لله عيلتي كويسة بس بجد في كتير من قرايبي انا معرفهومش فكان قصدي ان انا ممكن مكتبهومش

أختى besyans
اولا شكرا على ردك
ثانيا انا فعلا الملف بتاعى مش فيه غير وثيقة التعارف فقط
ومش فيه اى طلب تعيين خالص
اعمل ايه دلوقتى ؟؟
ولو رحت المبنى اللى سحنا منه حيرضو يدونى الورقه ولا لا
كان يجب أن تجدى الورقة ذو الوجهين موجودة بداخل غلاف وثيقة التعارف ... لكن فى تلك الحالة أذهبى لمكان سحب الملفات كما أخبرتك لتأتى بتلك الورقة ...

أخى الحبيب حسن
هل لوذاكرت كليه حقوق اثناء عملى طبعا ممكن يكون ليا الحق فى ان اقدم فى النيابه العامه والاداريه ........الخ زى طالب حقوق العادى ولا مينفعش
الأمر يعود لإلتحاقك بكلية الحقوق بأى طريقة ... فإذا كان إلتحاق إنتساب فى كلية حقوق بالجامعة ... فيكون الحق لك بعد التخرج أن تقدم فى النيابة العامة والنيابة الإدارية والنيابة العسكرية وكذلك أكاديمية مبارك للأمن بقسم الضباط المتخصصين ولكن الأكاديمية أكثر الأحوال لاتطلب حقوق ... لذلك باقى الجهات التى ذكرتها لك الحق بالتقديم فيها إذا لم يزيد سنك عن الثلاثين ....
أما إذا كان إلتحاقك بكلية الحقوق فى جامعة مفتوحه .. تعليم مفتوح .. فالأمر يكون للأسف مغلق فى جميع الجهات التى تم ذكرها ... وبالتوفيق ...

أخى الحبيب عمرو حمزاوى
كنت عايز اعرف هل احنا هنصور الملف دة زى معملنا ف النيابة العامة ولا لا ؟؟؟؟
جهات التحرى فى النيابة العامة هى ثلاث جهات ... لذلك تم الطلب بتصوير الملف ثلاث نسخ وإرفاقها بالملف .... أما النيابة الإدارية فجهات التحرى أثنين فقط ... حيث أن فى الإدارية لايوجد تحرى أمن قومى ... لذلك يتم التصوير نسختين فقط ... وهو ماتم التنويه على فى كراسة وثيقة التعارف بأن تقوم بتصوير الملف نسختين وإرفاقهم بالملف ...

انا اسف انى سالت السؤال كتير بس حابب اطمن انت عرفت معلومة ان هناك شرط خفى 70% نسبة مئوية
ياعزيزى أخبرتك أن بالفعل شرط خفى موجود فى النيابة الإدارية فقط ... حيث أن النيابة العامة ليس لها معيار نهائى للتقدير ... أما الإدارية تستخدم هذا الشرط فى التصفية كشرط خفى غير معلن ... لكن نعود ونقول أنه مرن ... أى لايطبق بشكل صارم ...

أخى الحبيب abe el rahman
أنا أرتكبت خطأ كبير اثناء كتابة البيانات حيث اننى كتبت 5 من اسماء ابناء العمات فى خانة ابناء الاعمام .....ومش عارف اصحح الخطأ دة أزاي هل انوة عنة فى الملحوظات, وازاى ولا اعمل اية
هون عليك ياعزيزى ... الأمر سهل إن شاءالله .... فقط قم بالتنويه عن ذلك فى الملحوظات الموجودة فى نهاية الملف ... أكتب (تم كتابة بيانات أبناء العمات فى خانات أبناء الأعمام سهواً) ... أما إذا كنت قد بدلت بين الأثنين ... أى أنك كتبت بيانات أبناء الأعمام فى خانة أبناء العمات ... وبيانات أبناء العمات فى خانة أبناء الأعمام .... أى عكست الأثنين ... فأنصحك من الأفضل أن تأتى على ورقة بيانات أبناء الأعمام وتقوم بوضع خط مائل على كلمة الأعمام وأكتب فوقها العمات ... وكذلك فى وقة بيانات أبناء العمات ضع خط مائل على كلمة العمات وأكتب فوقها الأعمام ... ولاتقلق ...

أختى sona tote
انا عندى مشكله كبيره جدا هى وانا بكتب الملف فى حاجات اتكتبت غلط وجيت اصلحها كتبت فوقها بق شكل الملف وحش جدااااا وكمان بابا كتبلى الاقارب فى الخانات الصغيره جدا دى اختصر بشكل فظيع وانا فى ورطه كبيره ومش عارفه اعمل ايه ونفسيتى باظت
انا بفكر اروح اسحب ملف تانى هل الموضوع ده هينفع وله لا ؟
أولاً الإختصار فى كراسة البيانات غير مطلوب نهائيا ... الإختصار فقط فى ورقة التعارف المرفقة بالملف ...حيث يتم كتابة الأقارب بها بشكل مختصر على أن يكون الإسم الأول فقط ... يعنى 1- محمد 2- إبراهيم 3- حسن ,,, وهكذا .. أما فى كراسة البيانات يتم كتابة البيانات كاملة وبالتفصيل .....
ثانياً بخصوص سحب الملف مرة أخرى فلاتوجد أدنى مشكلة فى ذلك .... أذهبى إلى مكان سحب الملفات وأسحبى ملف أخر بنفس الإجراءات ....

أختى orkedia
لا حضرت فهمتني غلط انا مش قصدي اخفي حد لان الحمد لله عيلتي كويسة بس بجد في كتير من قرايبي انا معرفهومش فكان قصدي ان انا ممكن مكتبهومش
إجابتى على سؤالك يشمل الإخفاء والسهو ... فالأمرين سواء .... فعليكى أن تأتى ببيانات أقارب على قدر المستطاع ... ولاتتركى فرد دون كاتبته ... حتى لايحدث مشكلة لكى ... نعم فى هذه الحالة سيجدوا أن من سهوتى عن كتابته ليس عليه قضايا فيكون الأمر طبيعى ... لكن من الأفضل أن تفعلى ماعليكى وتكتبى الجميع .....

بالتوفيق للجميع إن شاءالله
الدعاء والتوكل والإستغفار
اللهم أكرمنا بالتعيين ... توكلنا على الله ... أستغفر الله العظيم ...

هل الصور المطلوبه 8 بس ولا 9 عشان الصوره الي مطلوبه في طلب التعيين باسم المستشار رئيس الهيئه

لو سمحت استاذ رامى الخانات الخاصه بالمؤهل والمهنه صغير جدا لازم اكتب الاثنين ولا اكتب المهنه فقط وخصوصا انا عندي حاجات مكلكعه حبتين اعمل ايه
وبالنسبه لوالدتي هي متوفيه اكتب العنوان بتاعنا والدخل اكتب بجواره معاش ولا ايه
وشكرا جزيلا

معلش سؤال كمان المظروف المطلوب ده
البيج الكبير ولا الورق
وبالنسبه للفيش بتاع بابا هوا مش مطلوب بس هوا عمله اقدمه مع الورق ولا مش مهم
ولما اصور الملف صورتين اصور معاه كمان الاوراق المطلوبه ولا الكراسه وطلب التعيييين فقط
والف شكر

أخى الحبيب aly2020
هل الصور المطلوبه 8 بس ولا 9 عشان الصوره الي مطلوبه في طلب التعيين باسم المستشار رئيس الهيئه
عدد 8 صور مستقلين ... وتدبيس صورة أخرى على ورقة وثيقة التعارف المختصرة ... فيكون العدد الإجمالى 9 صور ...

أختى jojo
سمحت استاذ رامى الخانات الخاصه بالمؤهل والمهنه صغير جدا لازم اكتب الاثنين ولا اكتب المهنه فقط وخصوصا انا عندي حاجات مكلكعه حبتين اعمل ايه
للأسف يجب كتابة الأثنين وكل منهم فى خانته الخاصه ... حاولى كتابتهم بخط صغير وبإختصار لايفقد معنى البيان ....

وبالنسبه لوالدتي هي متوفيه اكتب العنوان بتاعنا والدخل اكتب بجواره معاش ولا ايه
بالنسبة للعنوان أكتبى العنوان الذى تسكنى به ... أما الدخل فأكتبى المرتب أو المعاش الذى كانت تتقاضاه ... لكن لاتكتبيه فى بيانات دخل الأسرة ... لأن فى دخل الأسرة تكتبى فقط الدخل الذى يعود عليكم بإستمرار والذى لم ينقضى لسبب ما ...

معلش سؤال كمان المظروف المطلوب ده
البيج الكبير ولا الورق
لا ... هم ظرفين لونهم أبيض والحجم كبير نوعاً ما ... فيجب أن يكون الحجم 25 فى 20 ... وهو موجود فى المكتبات ... فقط أطلبى من المكتبة ظرف 25*20 وذلك لتكتبى عليه البيانات المطلوبة منك كالمحافظة والعنوان ...

وبالنسبه للفيش بتاع بابا هوا مش مطلوب بس هوا عمله اقدمه مع الورق ولا مش مهم
هو غير مطلوب إطلاقاً ... وكذلك لايعد إثبات لبيان ما تم كتابته فى الملف لكى ترفقيه ... فهو غير مطلوب ....

ولما اصور الملف صورتين اصور معاه كمان الاوراق المطلوبه ولا الكراسه وطلب التعيييين فقط
فقط ما يتم تصويره هو كراسة البيانات التى مكتوب عليها وثيقة تعارف لمرشح نيابة إدارية .... أما الورقة المستقلة التى بوجهين حيث بها طلب التعيين ووثيقة تعارف مختصرة فأنتى غير مطالبة بتصويرها إطلاقاً .... فقط كراسة البيانات ...

بالتوفيق للجميع إن شاءالله

شكرا استاذ رامى كمال على مجهودك الفوق رائع فى هذا القسم..............انا بدخل القسم ده استمتع بس بردودك على الاسئلة فلا تحرمنا منها...............وشكرا لك وتقبل مرورى.

الف شكر استاذ رامي بجد ميرسي جدا ليك على مجهوداتك
وبالتوفيق للجميع

» النيابة الادارية دفعة 2009
» النيابة الادارية دفعة 2010
» النيابة العامة دفعة 2009
» النيابة الادارية
» موقع جديد لهيئة النيابة الادارية